عودة العصر الحجري لكليتنا...

السلام عليكم ورحمة الله وبركاته
اليوم : الاثنين
المكان : كلية عمان
الزمان : من الساعة 8:00 صباحا و لغاية الساعة 2:00 مساء
التاريخ : 8/9/2008 * 8/رمضان
اخواني الاعضاء المشاركين - طلاب كلية عمان -
أود لفت انتباهكم أو بالأحرى تأيدي لما سأقوله الآن
من كان اليوم في كلية عمان - الجامعية - من أجل السحب والإضافة فقد رأى وجرب شخصيا المعاناة التي حصلت في هذا اليوم
وهذا الشي غير محتمل ولا يطاق أبدا
- الله أكبر -
والله الله ما قالها
مختبر واحد وجهازين فقط وموظفين اثنين
يسحبون ويضيفون لطلاب السنة الثالثة في جميع التخصصات
وذلك مصحوبا بعدم احترام الطلاب من قبل موضفي امن الكلية وبعض موظفي التسجيل
انا بالنسبة إلي استنيت 2:30 ساعتين ونص مشان اسحب واضيف مادة واحدة فقط
أما بالنسبة لباقي الطلاب فقد انتظروا أكثر مني ولكن انتهى دوام موظفي القبول والتسجيل وتم تأجيل باقي الطلاب ليوم غد
بالله مو حرام
ايه والله لو انها صارت معي ما كنت تزحزحت من مكاني لخلص اموري

وقلت لأحد افراد امن الكلية ان الجامعات الاخرى لديها انتظام اكثر وان الطالب معزز ويسحب ويضيف بيده وعالنت وهو ببيته
فقال لي - انت في كلية مش جامعة -
بالله عليكم هذا رد؟؟!!!!!.. والله طلعت عيوني اليوم

اخواني اذا ضلينا ساكتين على هذا الوضع رح ترجع الكلية لوره أكثر من هيك
لام نلاقي حل
إما نروح على شكل جماعي إلى العميد
أو نشكي لهيئة مسؤلة - كوزارة التعليم العالي -

بدي همتكم معي لآنو ايد واحدة ما بتزقف
وبدي ردودكم الفعالة والمفيدة لمشكلة الجميع
ومو حابب كون مثل اللي قاعد بغني بالطاحونة
وما حدا يقولي مو طالع بايدنا شي
* صحيح انو نحنا قربنا نتخرج على خير ان شاءالله *
بس حرام الوضع يضل هيك - من هون لنتخرج بنكون توفينا من هالوضع


ومتأسف عالاطالة
والسلام عليكم ورحمة الله وبركاته.

The_prince_anas كتب:

وقلت لأحد افراد امن الكلية ان الجامعات الاخرى لديها انتظام اكثر وان الطالب معزز ويسحب ويضيف بيده وعالنت وهو ببيته
فقال لي - انت في كلية مش جامعة -

الحقارة من الامن هذا إلي بحكيلك إنتا بكلية مش جامعة

اكيد هذا عايد أو معاذ العمري

أوسخ خلق الله حطوهم امن عنا

انا كنت من ال8 موجوده بالجامعه
وكان في ناس من قبل موجودين لانه عارفين انه في صراع!!!
وبالاخر عشان يضيفولي بس ماده!!!!

وبس 2 والله حرام لو وقفنا عند التسجيل كان احسن واسرع
واصلا ما كانوا يعملوا للطلاب متل ما بدهم
بتقوله بدي هالماده بيقولك بتتعارض او او او او
وبيصير يغيرلك جدولك على كيفه!!!!

غير انه لما رحت ادفع مو قابلين يطبعوا الجدول بالتسجيل
قال استاذ حسين قايل لا
وبالمحاسبه ما بدهم يطبعوه
يعني ساعه بين التسجيل والمحاسبه
عشان يطبعوا الجدول عشان يأكدوا المواد الي ضفتهاا

كلامكم كله صح وعلى عيني وعلى راسي يس ...

الكلام سهل كتير، ونحنا العرب ما في أشطر منا بالكلام

عدم المؤاخذة، كل واحد ممكن يحكي أنا راح أساعد، بس كم واحد راح بيساعد فعلاً وقت الجد؟!!!

لا، أنا مش يائس ولا بحاول أهبط معنوياتكم بس، يقول الله تعالى: "لا يغير الله ما في قوم حتى يغيروا ما في نفوسهم"

المسلمين زمان عملوا العجايب وصنعوا المعجزات، مش عشنهم كانوا أقوى أو أكتر، بالعكس في معراك كتيرة خاضوها وكان عددهم فيها وعدتهم قل، لكن كانوا قلوبهم على بعض، بفكروا ببعض، عندهم ايثار لبعض، مستعدين للتضحية من أجل القضية يلي بأمنوا فيها، كلكم تحكوا عن فلسطين وبتحبوا فلسطين بس كم واحد مستعد يموت عشان فلسطين ؟!!! قليل جداً منا المستعدين للتضحية فعلاً

وهسا نحكي عن الكلية وتغييرها، بس كم واحد منكم مستعد يواجه الادارة والدكاترة والعميد؟!!! نحنا يا جماعة محتاجين لأشخاص ينفذوا يلي بحكوه، وأنا عم بحكي هيك اعتباطاً، أنا مريت بتجربة وبناء عليها بحكي هذا الكلام.

قبل 6 أشهر تقريباً جمعت تواقيع ورفعته للعميد من أجل تحسين خدمات الكلية، الكل كان متحمس ويوقع ووصلت التواقيع لفوق الـ 700 وفيها 10 طلبات، ورفعتها للعميد، بعدين معظم يلي كانوا متحمسين ووقعوا اجو لعندي عشان يسحبوا التواقيع، عشان واحد كندرة جزمة عتيقة ما بسوى شلن تعين بالواسطة رئيس قسم هددهم، منيح انه المهددهم مش واحد محرز، ولو شو كانوا عملوا؟

ما شي ننسى هاي ...

مرة ثانية أنا وكم واحد من الناس القلال يلي صمدوا معي وظلهم على موقفهم وأثبتوا انهم فعلا زلام يعتمد عليهم، كتبنا عن الوضع المأساوي للكلية على الانترنت وفي الصحف الأسبوعية واليومية، وشو كانت النتيجة، مجرد تهديد بسيط من عميد الكلية ورئيس القسم الزبالة خلالهم مش بس يتراجعوا، خلاهم كمان ينسوا (عدم المؤاخذة) حليب أمهم، وصاروا عملاء وجواسيس (كأن الواحد قاعد في ثكنةعسكرية) للعميد ومن والاه.

بعديها كثفت الشكوى على الكلية في معظم الصحف ورفعت كتاب شكوى عن الكلية والعميد ورئيس القسم لوزير التعليم العالي، وشرحتله في الكتاب القصة كاملة

والحمد لله والفضل لله، طلعت من الموضوع زي الشعرة من العجين، لسببين: الأول - نيتي كانت صافية، والثاني - كنت على حق والله بنصر الحق، والفضل كله برجع لله، والله أتم نعمته علينا وطار الريماوي وان شاء الله العميد راح يلحقوا.

أنا آسف إذا هبطت معنوياتكم أو أزعجتكم أو طولت عليكم، بس هذه المقدمة يلي عايشتها ضرورية عشان تفكروا منيح قبل ما تحكوا، وأنا مستعد للمساعدة مرة ثانية ومش فارقة عندي ولا عامل حساب لحدا بس بشرط واحد، يلي بكتب هون في الردود أنا بدي أساعد يكون قد كلمته، لأنه إذا بدنا نشتغل نشتغل شغل رجال مش شغل ولدنة.

وآسف مرة ثانية على الاطالة واتأكدوا انه صاحب الحق دايما بنتصر، ويلي صار بالريماوي أكبر دليل انه ما في حدا أكبر من القانون والأهم من هيك ما في حدا أكبر من الله.

والله يا انس انا ما كنت موجود

بس اسمعت

يلا بعين الله

السلام عليكم ورحمة الله وبركاته
اخواني الأعضاء مشكورين جزيل الشكر على ردودكم
بصراحة انا كنت متوقع مثل هيك ردود - ما بدنا حكي/ مش طالع بايدنا اشي / الله بيعين / نشتم فلان وفلان / مشكور / و و و و ...... -
وكمان كنت متوقع يكون في حدا مستجيب و على ما يبدو انو ما حدا مستعد يكون معي إلا شخص واحد وهو الأخ محمود التكريتي

اقتباس :

وأنا مستعد للمساعدة مرة ثانية ومش فارقة عندي ولا عامل حساب لحدا بس بشرط واحد، يلي بكتب هون في الردود أنا بدي أساعد يكون قد كلمته، لأنه إذا بدنا نشتغل نشتغل شغل رجال مش شغل ولدنة.

فأنا بتمنى من اللي حابب يكون معنا ويساعدنا يسجل اسمه ويقول انا مستعد
ومن هون للأسبوع القادم ان شاءالله بنكون شفنا الردودو الفعالة فعلا - مع احترامي للجميع - ومنحدد موعد لرفع كتاب للعميد أو أي جهة مسؤولة
والله ولي التوفيق

اقتباس :

واتأكدوا انه صاحب الحق دايما بنتصر

بسم الله نبدأ
ولنشوف المستعدين فعلا
وأرجو من غير المستعدين بمشاركتنا في حل مأساة الجميع في الكلية عدم التعليق غير الفعال
واقبلوا احترامي جميعا
والسلام عليكم ورحمة الله وبركاته

انا معك يا الله شو اتغلبنا انا الله وكيلك اجيت على 8 خلصت على 1.30 علشان اضيف مادة ويا الله المشاكل غير الدفع واجيت اسحب جدول ما في الا بعد الساعة 12 بتروح على الساعة 12 بئلك لبكره اجيت اليوم اسحب جدول علشان الحق المحاضرة بتئلك التسجيل ادفعي دينار والله هادا اشي بتصدق غير الي بده علاماته الصيفي بؤولوك ادفعي 5 والله مو عارفة شو هل جامعة
وانا معكم بأي اشي بتأمرو عليها علشان انحل هل مشكلة

والله ما بقدر اقول غير الله يعينكم

صبرا جميل والله المستعان على ماتصفون

يلا انس شد همتك انت والشباب بتقدروا تصنعوا المستحيل

السلام عليكم ورحمة الله وبركاته
الأخ @ Abody @

اقتباس :

انا فكرت في الموضوع واحسن حل هوا
نذهب لدكتور المرشد الاجتماعي ونشرحلو الوضع
ولازم يعطينا حل

انا بوافقك الرأي
شو رأيكم يوم الاثنين 22/9/2008
الساعة 9:00 ص
نروح عالمرشد؟؟؟؟؟ وبنشوف شو الله بيسر..... والعفو
لآنو هذه مأساة الجميع وليست مأساة شخص واحد

الأخت بسمة ألم

اقتباس :

وانا معكم بأي اشي بتأمرو عليها علشان انحل هل مشكلة

ما عليك أمر اختي
ومثل ما اقترح الأخ @ Abody @
ان شاءالله رح نعمله بس لنشوف مين مستعد

وبتمنى من المستعدين فعلا يعطونا خبر بأقرب فرصة يعني ليوم الأحد 21/9

والله لي التوفيق

كامل الاحمد المدلل

اقتباس :

والله ما بقدر اقول غير الله يعينكم

صبرا جميل والله المستعان على ماتصفون

يلا انس شد همتك انت والشباب بتقدروا تصنعوا المستحيل

شكرا الك حبيبي لأنك حاسس فينا وان شاءالله بتنجح بالتوجيهي وبتفوت أحسن الجامعات
أوعك تغلط مثلنا

والسلام عليكم